شباب سے پہلے ( حصہ پنجم )

میرے والد صاحب نے گھر آ کر یہ مژدۂ جانفزا سنایا کہ پاکستان بننے کا اعلان ہو گیا ہےجہاں ہم رہتے ہیں وہ علاقہ پاکستان میں شامل ہے  ۔ میں نے دیکھا کہ اس خوشی کے موقع پر خوشی کے ساتھ ساتھ ان کے چہرے پر غم کی گھٹائیں چھائی ہوئی تھیں ۔ بعد میں خود ہی انہوں نے اس رنج کا اظہار فرمایا کہ ہمارا وطن عزیز فیض اللہ چک ہندو ستان میں شامل کر دیا گیا ہے ۔ ہمارے عزیز رشتہ دار تمام ان علاقوں میں مقیم تھے جو مشرقی پنجاب میں تھے ۔ مشرقی پنجاب میں خاک وخون کا کھیل کھیلا جا رہا تھااس لیۓ ہم لوگ اپنے رشتہ داروں کے لیۓ سخت پریشان تھے  ۔ میری بہن میرے چچا صاحبان، ماموں صاحب وغیرہ سب کے سب مشرقی پنجاب میں تھے ۔ کئ روز تک ہمارے گھر پر غم کی  گھٹایئں چھائی رہیں ۔ ہمارے عزیزوں کو بھی ان تمام مراحل سے گزرنا پڑاجو دیگر مسلمان مہاجرین کو درپیش تھے ۔ باہزار دقت خطرات سے بچتے بچاتے سب لوگ خدا کے فضل سے بخیر و عافیت صرف جانیں لے کر اپنے محبوب پاکستان میں آن پہنچے ۔ جب ہمیں اپنے عزیزان کی خیریت کی خبر ملی تو ہم سب سجدۂ شکر بجا لاۓ ۔ میرے والد صاحب نے میری بہن اور بہنوئی ، میرے چھوٹے چچا اور ان کے بچوں کو اپنے پاس بلا لیا جب تک ان کے گھروں کا متبادل انتظام نہ ہو گیا ۔

  پاکستان بنتے ہی ہماری نوزائیدہ مملکت خداداد پر مصائب کے پہاڑ ٹوٹ پڑے ۔ مشرقی پنجاب سے تباہ حال مہاجرین کا سلسلہ ٔ آمد شروع ہو گیا ۔ ایسی ابتری کی حالت میں کثیر تعداد مہاجرین کی آباد کاری کا مسٔلہ جوۓ شیر لانے کے مترادف تھا۔فیروز پور اور راجپوتانہ سے آمدہ مہاجرین ریاست بہاولپور کے راستہ دریاۓ ستلج کو ہیڈ اسلام پرسےعبور کرتے ہوۓ لڈن سے گزر رہے تھے ۔ ہر روز مہاجرین کے قافلے ہمارے گھر کےسامنے سے گزرتے ۔ غمزدہ مہاجرین کی غم کی داستانیں سنی نہ جاتی تھیں ۔ بچے بوڑھے اور عورتیں بھی ظلم سے مستثنیٰ نہ تھے ۔ میں اچھی طرح ان واقعات کا مطلب نہ سمجھتا تھا ۔ سخت حیران تھا کہ صدیوں سے آباد گھرانوں کو کس بنا پر گھر سے بے گھر کیا جا رہا ہے ۔ آخر ان بےکس مسلمانوں کا قصور کیا ہے ۔ ہندو سکھ اور مسلمان صدیوں سے ہندوستان میں اکٹھے رہتے چلے آرہے ہیں۔ یہ لوگ ایک خاندان کی مانند تھے آخر یک بیک وہ اتحاد کیا ہوا ۔ باہمی محبت اور تعلقات کچے دھاگے کی طرح کیوں ٹوٹ گیۓ  ۔ ایک ساعت میں دلوں میں اس کدورت ، کینہ پروری اور بغض و عناد نے کیونکر جنم لے لیا ۔ انسان نے حیوان کا روپ کیوں دھار لیا ہے۔ میں نے مہاجرین سے جو کچھ سنا وہ میرے لیے بہت حیران کن تھا ۔ میں اس نوعیت کے واقعات  ظلم و ستم اور جوروجفا سے اس وقت تک قطا” ناآشنا تھا۔ اس قسم کے واقعات پاکستان میں بھی رونما ہو رہے تھے ۔ مشرقی پنجاب کے مظلوم مسلمانوں کا بدلہ لینے کے لیۓ مغربی پنجاب میں بھی مسلمانوں نے ہندوؤں اور سکھوں کے ساتھ وہی سلوک روا رکھا مگر میرے گردوپیش کامل امن رہا۔ یہاں کے ہندو اور سکھ امن و امان سے تھے ۔ میاں ریاض دولتانہ نے تمام مسلمانوں سے اپیل کی کے لڈن میں اور اس کے گردو نواح میں اس قسم کا کوئی غیر انسانی اور غیر اسلامی واقعہ پیش نہ آۓ ۔ ہندوؤں کو ہر طرح سے مطمئن رہنے کا یقین دلایا ۔ اس اپیل کا خاطر خواہ اثر ہوا  ۔ میاں دولتانہ چونکہ مالک کی حیثیت رکھتے تھے اس لیۓ مزارعین اور دیگر لوگوں نے ان کے حکم سے سرتابی نہ کی اس لیۓ میں نے اپنی آنکھوں سے فسادات کی جھلک تک نہیں دیکھی ۔ ایسے ہی حالات میں دو ماہ کی رخصتیں ختم ہو گئیں مگر حکومت کی طرف سے 15 دن کے لیۓ مزید رخصتیں دے دی گئیں ۔ اڑھائی ماہ بعد جب میں دوبارہ سکول آیا تو کایا پلٹ چکی تھی ۔